සමුපකාර ගීතය,කොඩිය,ලාංජන‍ය

සමුපකාර ව්‍යපාරයේ අභිමානය ලොවට කියන අපේ සමුපකාර ගීතය. ( සමුපකාර ගීතයේ පසු බිම - සි.ස මොරවක් කොරලයේ තේ නිපදවන්නන්ගේ සමුපකාර සමිතිය කොටපොල.) මේ විඩියෝව නිර්මානය සි.ස මොරවක් කොරලයේ තේ නිපදවන්නන්ගේ සමුපකාර සමිතිය කොටපොල විසින් සිදුකර ඇත. ඒ පිලිබදව ඌවේ අපි ඔවුන්හට ස්තුතිය පිරිනමමු.

සමුපකාර ගීතය ( Cooperative Song )

මහජන දියුණුව සැලසෙන්නේ

පදනම සහයෝගය වෙමිනේ

සමගි බලේ // / යොදවමිනේ

සිරිලක නිදහස රැුකදෙන්නේ

ජය වේවා සිරිදේවා - සමුපකාරය පැතිරේවා

උස්මිටිකම් අමතක කරදා

දුර හැර ආගම් කුල බේදා

අලස නොවී /// දිරිය යොදා

ලක්මව සුරකිමු අපි සැමදා

ජයවේවා - සිරිදේවා - සමුපකාරය පැතිරේවා

තම තමනට දෙන ආධාරේ

විලස ගැනේ සම උපකාරේ

දිළිඳු දනා /// පෙළ අතරේ

සේවය වෙයි සිරිලක් අඹරේ

ජය වේවා - සිරිදේවා - සමුපකාරය පැතිරේවා

සිය රට ගොඩමඩ ගොවිතැනෙහි

වෙළහෙළදාමෙහි අත්තමෙහි

දියුණුවටා /// මතු දිනෙහි

පිහිටයි සමුපකාරයෙහි

ජය වේවා - සිරිදේවා - සමුපකාරය පැතිරේවා

ජාතික ධනය ද සුදුසු ලෙසේ

පොදු ජනයා හට බෙදන ලෙසේ

සමවාසී /// ලැබෙන ලෙසේ

සමුපකාරයෙන් ඉඩ සැලසේ

ජය වේවා - සිරිදේවා - සමුපකාරය පැතිරේවා

සමුපකාරය බලය යොදා

රට තොට උවදුරු නැති කරදා

අසරණයා // දුකින් මුදා

සැමටම සුබසෙත කරමු උදා

ජය වේවා - සිරිදේවා සමුපකාරය පැතිරේවා

සමුපකාර ගීතයේ ප‍්‍රබන්ධය -  සරණගුප්ත අමරසිංහ මහතා
සමුපකාර ගීතයේ තනු නිර්මාණය - ජේ. කේ. සෙබස්තියන් පෙරේරා මහතා

සමුපකාර ගීතය  ප‍්‍රබන්ධය කල  සරණගුප්ත අමරසිංහ මහතා. 

1934 මැයි මස 20 වැනි දින භාරතීය මහා කවි රවීන්ද්‍රනාත් තාගෝර්තුමන් අතින් මුල්ගල තබා ආරම්භ කරන ලද ‘ශ්‍රීපාලිය’ එදා මෙදා තුර මෙරට සෞන්දර්ය කලා විෂයයන් සඳහා ලබාදුන් දායකත්වය අතිමහත්ය. කලාභවනෙහි සංගීත ඉගැන්වීම සඳහා මුලින්ම පැමිණි ආචාර්යවරයා වූයේ සරණගුප්ත අමරසිංහ මහතා ය.

නිල් අහස් තලේ අගෙයි නෑ වළාකුළු

ලස්සනයි පුරාහඳේ රැස් විහිදීලා //

මල් විසිරිලා වාගෙයි තාරකා සිරි

ලස්සනයි පුරාහඳේ රැස් විහිදීලා //

විල් නෙළුම් නිදා වැටෙයි මානෙල් මල් පිපී

ලස්සනයි පුරාහඳේ රැස් විහිදීලා //

රැල් සිසිල් සුළං සැපයි මේ රැයේ වැදී

ලස්සනයි පුරාහඳේ රැස් විහිදීලා //

SW  14 අංකය යටතේ 1943 වර්ෂයේදී තැටිගත කෙරුණු “නිල් අහස් තලේ” ගීතය LANKA FILM COMPANY LTD. තැටි ලේබලයෙන් නිකුත් වුණු “ළමා ගීත ශ්‍රේණියේ” එක ගීතයක් විය. තැටි ලේබලයේ “CHILDERN’S SONG SERIES” යනුවෙන් සටහනක් ද යෙදුණි . ගීතය ගායනා කළේ යූ .ජී.පී ද සිල්වා නම් මහත්මයෙකු විසිනි. ගීතයේ තනුව ද යූ .ඩී. පෙරේරා මහතා විසිනි. සංගීතය සැපයුවේ සරණගුප්ත අමරසිංහ මහතා සහ ඔහුගේ වාද්‍ය මණ්ඩලය විසිනි. සරණගුප්ත අමරසිංහ මහතා එවකට LANKA FILM COMPANY LTD.  තැටි ලේබලයේ ප්‍රධාන ගායකයෙකු මෙන්ම සංගීත අධ්‍යක්ෂකවරයෙකු ද විය.

කුඩා කාලයේදී ඇසුනු සරණගුප්ත අමරසිංහ ගායනා කළ “පායනා කාලෙදී” ගීතයේ තනුව බොහෝ දෙනාට නිතැතින්ම මතකයට ඒයි.

රෑ දවල් මහන්සි වී කන්න දේ රැස් කරත් කූඹියෝ

සීතෙනුත් වැස්සෙනුත් බේරිලා ඉන්නවා ගේ සදන් එක්වෙලා කූඹියෝ

උන් ඉතා ඉක්මනින් යන්නෙ මේ සන්තොසින් කම්මැලී නෑ කිසිත් කූඹියෝ

දැන් අපත් ඒ වගේ ඉන්නවා නම් හොදයි කම්මැලී නෑ වගේ කූඹියෝ

සමුපකාර කොඩිය (Cooperative Flag)

2017 ජුලි පළමු සෙනසුරාදා සිට  ශ්‍රි ලංකාවේ ද  2012 ජාත්‍යන්තර සමුපකාර වර්ෂයට සමගාමිව ජාත්‍යන්තර සමුපකාර සංධානයද පිළිගත් සමුපකාර ධජය 



දේදුනු ධජය 1921 -  2001

සමුපකාර ව්‍යාපාරයේ ඉහළම ආයතනය වන්නේ 1895 දී පිහිටුවන ලද ජාත්‍යන්තර සමුපකාර සන්ධානයයි. ICA යනු ස්වාධීන රාජ්‍ය නොවන ආයතනයක්  වන අතර එය ලොව පුරා සමුපකාරයන් නියෝජනය කරයි.1896 දී ජාත්‍යන්තර සමුපකාර සම්මේලනය (ICA  II සම්මේලනයේදී යෝජනා කළද, 1921 දී ජාත්‍යන්තර සමුපකාර සන්ධානය දේදුන්නෙහි වර්ණ එක්සත්කම හා විවිධත්වයේ සංකේතයක් ලෙස ජාත්‍යන්තර සමුපකාර ධජය මත භාවිතා කිරීමට පටන් ගෙන ඇත.

ලෝක සමුපකාර නායකයින්ගේ සහභාගිත්වයෙන්  1921 වර්ෂයේ ජාත්‍යන්තර සමුපකාර සම්මේලනය ස්විට්සර්ලන්තයේ බාසල්හිදී රැස් වූ විට දේදුනු ධජය සමුපකාර නිලවශයෙන්  පිළිගැනිමට ලක් විය..

1922 දී ජර්මනියේ එසෙන්හිදී,පැවැත්වු ජාත්‍යන්තර සමුපකාර සන්ධානයේ සම්මේලනයේදි  (ICA) තීරණය කරන ලදුව  1923 ජූලි මාසයේදී පවත්වන ලද පළමු "සමුපකාර දිනය" සඳහා ජාත්‍යන්තර සමුපකාර සංකේතයක් සහ ධජයක් නිර්මාණය කරන ලදී.  විවිධ මෝස්තර සමඟ අත්හදා බැලීම් වලින් පසුව , සුප්‍රසිද්ධ ප්‍රංශ සමුපකාරක මහාචාර්ය චාල්ස් ගයිඩ්, දේදුන්නෙහි වර්ණ හත ධජය සඳහා භාවිතා කිරීමට යෝජනා කළේය. පළමු සමුපකාර දේදුන්න ධජය 1924 දී නිම කරන ලද අතර එය 1925 දී ජාත්‍යන්තර සමුපකාර ව්‍යාපාරයේ නිල සංකේතයක් ලෙස සම්මත විය.

සර්වකාලීන හා සියළු ජාතීන් නියෝජනය කරන දේදුන්නේ පැහැය මෙම ධජයට ගෙන ඇත. සමුපකාර කොඩිය සෑම රටකටම එකසේ බලපවත්වයි. මෙයින් පිළිබිඹු කරන්නේ අනාගත මානව දයාවේ විශ්වාසනීයත්වය බව චාල්ස්ගයිඞ් මහතා ප‍්‍රකාශ කර ඇත.

සමුපකාර කොඩියේ සඳහන් වර්ණ 07 න් කියවෙන්නේ පහත සඳහන් අදහස්ය .

රතු පාට : උට්ඨාන වීර්ය රඹ පාට : හරි දැක්ම වෙනුවෙන් කැපවීම

කහ පාට : අභියෝගයන්ට ඥාණාන්විතව මුහුණ දීම.

කොල පාට : සමුපකාරක හරයන් මැනවින් අවබෝධ කර ගැනීම හා සාමාජිකත්ව වර්ධනය

ලා නිල් පාට : සමස්ථ මිනිස් වර්ගයාගේ එකමුතුකම හා සහජීවනය.

දම් පාට : මිත‍්‍රත්වය හා ප‍්‍රබෝධමත් බව.

2001  - 2012  ICA ධජය

2001 දී ICA (ජාත්‍යන්තර සමුපකාර සන්ධානය) සිය ධජය වෙනස් කිරීමට තීරණය කළේය.  1923 සිට පිලිගත් ශඩ්වර්ණ ( දේදුනු වර්ණ) සමුපකාර කොඩිය  සමුපකාර නොවන කණ්ඩායම් ගණනාවක් විසින් එය භාවිතා කිරීම ලොව පුරා රටවල් කිහිපයක ව්‍යාකූලත්වයට හේතු විය. සමුපකාර ව්‍යපාරයේ අනන්‍යතාව වඩාත් හොදින් ශාක්ෂාත් කර ගැනිම සඳහා ජාත්‍යන්තර සමුපකාර සංධානය විසින් සාම්ප්‍රදායික දේදුන්න ධජය වෙනුවට 2001 අප්‍රේල් මාසයේ සිට ICA සිය නිල ලාංඡනය සහිත ධජය භාවිතයට ගන්නා ලදි.

සම්භාව්‍ය 7-තීරු සමුපකාර දේදුන්න ධජය 1925 දී සම්මත කර ගත් නමුත් 1980 සහ 1990 දශකය තුළ "දේදුන්න කොඩි" ලොව පුරා ජනප්‍රිය විය. උදාහරණයක් ලෙස දකුණු ඇමරිකාවේ භාවිතා කරන තීරු 6 කින් යුත් “සමලිංගික ධජය” හෝ “ඉන්කා කොඩි”. හා ඉතාලි පැසිෆිස්ට් කොඩි ද සඳහන් කළ හැකිය. සමුපකාර ධජය සහ අනෙකුත් "දේදුන්න ධජ" අතර ව්‍යාකූලතාවයන් වළක්වා ගැනීම සඳහා සිය ධජය වෙනස් කිරීමට ICA තීරණය කළේය. නව ධජය සුදු ය, එහි ඇතුළත ICA ලාංඡනයක් ඇත. මෙම නව ජාත්‍යන්තර සමුපකාර ධජයේ දේදුන්න වර්ණ 6 කින් යුක්ත වේ. හත්වන වර්ණය දේදුන්නට පහළින් ඇති පෙළෙහි දිස්වේ. මෙම ධජය ශ්‍රි ලංකාව තුල භාවිතා වි නොමැත.

වර්ථමාන සමුපකාර ධජය 2012 සිට ....

එක්සත් ජාතීන් විසින් ප්‍රකාශයට පත් කරන ලද 2012 ජාත්‍යන්තර සමුපකාර වර්ෂය හේතුවෙන් COOP වචනයෙන් නව ලාංඡනයක් සහිත ධජයක් ජාත්‍යන්තර සමුපකාර සන්ධානය විසින් නිර්මාණය කරන ලදී.  ඒ අනුව මේ වන විට දේදුනු වර්ණ කොඩිය වෙනුවට  coop අක්ෂර සහිත මෙරුන් පැහැති  කොඩිය සමුපකාර කොඩිය ලෙස ශ්‍රි ලංකාවේද පිළිගෙන ඇති අතර 2017 ජුලි පළමු සෙනසුරාදා පැවති ජාත්‍යන්තර සමුපකාර දිනයේ සිට නව කොඩිය ශ්‍රි ලංකාවේ භාවිතා වේ.

 ශ‍්‍රී ලංකාවේ නිල සමුපකාර ලාංජනය The official logo of Sri Lanka Co-operative

ශ‍්‍රී ලංකාවේ නිල සමුපකාර ලාංජනය නිර්මාණය කරන ලද්දේ  ඕවන් වීරක්කොඩි මහතාය. මෙයින් පිළිබිඹුවන්නේ, කාර්මික, කෘෂිකාර්මික සහ සේවා ක්‍ෂෙත්‍රයේ සංකලනය සහ සහයෝගීත්වය සහ සංවර්ධනයයි

2018 දි සමුපකාර ලාංජනයට වසර 50 සපිරුණි.

 ඕවන් වීරක්කොඩි මහතා .......

1968 වසරේ පුවත්පතක සමුපකාරය වෙනුවෙන් ලාංජනයක් නිර්මාණය කිරීම සඳහා තරගයක් පැවැත්වෙන බවට දැන්වීමක් පළකර තිබුණි. ඒ කාලය වනවිට සමුපකාර ක‍්‍රමය ලංකාවේ ව්‍යාප්තව තිබූ අතර ධීවර, පොල් සහ විවිධ සේවා සමුපකාර සමිති විවිධ ලාංජන භාවිත කරනු ලැබීය.
 
 1968 වසරේ පේරාදෙණිය විශ්වවිද්‍යාලයේ පළමු වසරේ සිසුවකුව සිටියදී තමන් විසින් අඟල් 6×6 ප‍්‍රමාණයෙන් නිර්මාණය කර යවන ලද ලාංජනයට එවකට සමුපකාර කොමසාරිස්ව සිටි ඕල්කොට් ගුණසේකර මහතා විසින් ජයග‍්‍රහණය කළ බව දන්වා ලිපියක් එවා තිබූ බවත් කොල්ලූපිටියේ සමුපකාර මන්දිරයේදී පැවැති උත්සවයේදී රුපියල් දාහක චෙක්පතක් ලැබූ බවත් පවසයි. එදින සමුපකාරය වෙනුවෙන් කෙටි චිත‍්‍රපටයකට හිමි ත්‍යාගය ආචාර්ය තිස්ස අබේසේකරයන්ට හිමි විය. යෞවනයකුව සිටි අවධියේ මෙරට සමුපකාරය ව්‍යාපාරය වෙනුවෙන් ඇඳි ලාංජනය අද දක්වාම පැවතීම පිළිබඳව ඕවන් වීරක්කොඩිට ඇත්තේ ආඩම්බරයකි.
 
 එසේම ලංකාවේ පැවැති නොබැඳි ජාතීන්ගේ සමුළුව සඳහාද ලාංඡුනයක් තමන් නිර්මාණය කළ බවත් තඹ වලින් කරනලද එම නිර්මාණය තවමත් බණ්ඩාරනායක සම්මන්ත‍්‍රණ ශාලාවේ ඇතිබව ඕවන් පවසයි. එසේම සුමති ටෙලි සම්මානය, යෞවන සම්මානය, සමෘද්ධි ලාංජනය වීරක්කොඩිගේ නිර්මාණයන් ය.

ඕවන් වීරක්කොඩි පිළිබඳ විස්තර හා ඡයාරුපය  දිවයින වෙබ් අඩවියෙන් උපුටා ගන්නා ලදි.